Disgwylir i’r digwyddiad a drefnir gan Gyngor Abertawe gael ei gynnal ddydd Sul 19 Medi a bydd y cyfle i gofrestru’n cau ar 31 Awst, er gall hyn fod yn gynharach os nad oes lleoedd ar ôl cyn hynny.

 Er mwyn dathlu lansiad y digwyddiad ym 1981, bydd digwyddiad eleni’n dathlu popeth sy’n ymwneud â’r 1980au, felly mae croeso i’r rheini sy’n cymryd rhan ddathlu popeth am yr 80au drwy wisgo gwisg ffansi fel bandiau chwys, cynheswyr coesau, gwallt mawr a lliwiau llachar – ewch yn wyllt! Gallwch ddisgwyl cerddoriaeth a chymeriadau o’r 80au a digon o adloniant yn y parthau cefnogi ar hyd y llwybr.

 Disgwylir i gannoedd o bobl sydd newydd ddechrau rhedeg ymuno â 40fed ras 10k Bae Abertawe’r haf hwn a noddir gan Admiral. Dechreuodd llawer o bobl redeg ar ôl iddynt dreulio cannoedd o oriau ychwanegol yn eu cartrefi oherwydd y pandemig.

Meddai Aelod Cabinet y Cyngor, Robert Francis-Davies, “Mae llawer o bobl wedi dechau rhedeg, loncian neu gerdded dros yr 16 mis diwethaf.

“Mae’n debyg bod llawer eisoes wedi hyfforddi digon i allu rhedeg y ras 10k, ond nid ydynt wedi sylweddoli hynny eto!

“Mae rhedeg wedi bod yn ddihangfa y mae llawer wedi’i fwynhau, yn enwedig dros y flwyddyn ddiwethaf neu cyn hynny, ac mae wedi cynnig buddion iechyd a lles go iawn.

“Ar gyfer y rheini sydd wedi bod yn rhedeg neu loncian dros y misoedd diwethaf, mae’r 10k yn gyfle gwych i fwyhau llwybr gwastad, llawn golygfeydd mewn ffordd newydd. Gall fod yn her gyffrous newydd – a bydd y rheini sy’n cymryd rhan yn ennill gwobr i ddathlu pen-blwydd y ras yn 40 oed!”

Fel yr holl ddigwyddiadau rhedeg yng Nghymru, gohiriwyd ras y llynedd o ganlyniad i’r pandemig. Bydd ras eleni’n un arbennig iawn am ei bod yn dathlu pen-blwydd ras 10k Bae Abertawe’n 40 oed.

Dyma fydd y 15fed achlysur i gwmni Admiral noddi’r digwyddiad, sydd yn ogystal â’r 10k yn cynnig rasys hwyl iau 1K a 3K, ynghyd â ras 10k i bobl mewn cadair olwyn a ras masgotiaid.

Meddai Rhian Langham, Pennaeth Gwasanaethau Pobl Admiral, “Rydym yn falch o barhau i noddi ras 10k a rasys hwyl Bae Abertawe Admiral am y 15fed flwyddyn. Mae cefnogi diwyddiadau yn ein cymuned leol yn rhan fawr o’n diwylliant yma yn Admiral felly mae’n wych bod yn rhan o ddigwyddiad fel hyn, yn enwedig ar ôl blwyddyn heriol. Hoffwn achub ar y cyfle hwn, ar ran pawb yn Admiral, i ddymuno pob lwc i’r holl redwyr.”

Bydd Tîm Digwyddiadau’r cyngor yn parhau i fonitro sefyllfa’r pandemig yn agos. Cynhelir ras 10k Bae Abertawe Admiral yn unol â rheoliadau a chanllawiau perthnasol Llywodraeth Cymru, Iechyd Cyhoeddus Cymru ac Athletau’r DU.

Bydd mesurau fel dechrau’r ras ar adegau gwahanol yn sicrhau bod y ras yn ddiogel i bawb sy’n cymryd rhan, gan gynnwys y gymuned ehangach.

Sicrhawyd lleoedd i’r rheini a gofrestrodd ar gyfer digwyddiad 2020 yn awtomatig ar gyfer digwyddiad dathliadol eleni.

Ewch i swanseabay10k.com am ragor o wybodaeth ac i gadw’ch lle ar y llinell gychwyn.

Dros yr ychydig wythnosau nesaf i ddathlu ein pen-blwydd yn 40 oed, bydd Nigel Jones, sydd wedi bod yn Gyfarwyddwr Rasys 10k Cyngor Abertawe ers 1986, yn archwilio’i archif 10k helaeth ac yn siarad â rhai o’r bobl allweddol sydd wedi bod yn rhan o’r ras dros y blynyddoedd.

Mae ein herthygl gyntaf am Chris Peregrine, a oedd yn gweithio fel newyddiadurwr ifanc ar gyfer South Wales Evening Post ym 1981. Hyrwyddodd Chris yr awgrymiadau ar gyfer sut i ddechrau hyfforddi, ysgrifennodd erthyglau cyn ac ar ôl rhai o rasys 10k cynnar Bae Abertawe a chymerodd ran yn y ras gyntaf…

Gwnaeth pobl o fath penodol estyn y ffiniau ym 1981.

Gyda chychwyniad Marathon Llundain ym mis Mawrth y flwyddyn honno, newidiodd wyneb rasio am hwyl am byth, gan ganiatáu amaturiaid i redeg ochr yn ochr â pherfformwyr ar lwyfan proffil uchel, yr oedd llwyddiant y ras wedi cyrraedd lefelau annirnadwy dros y blynyddoedd dilynol. A gellid dweud yr un peth am ras gyntaf 10k Bae Abertawe, a ddilynodd olion traed Llundain ym mis Hydref y flwyddyn honno.

Ond does dim gwerth trefnu digwyddiad i dorf o gyfranogwyr os nad oes unrhyw un yn gwybod amdano. Roedd yn rhaid lledaenu’r neges, a pha ffordd well o wneud hynny na thrwy’r papur newydd sy’n parhau i wasanaethu’r gymuned, y South Wales Evening Post? Roeddem yn barod am yr her.

Caiff y dywediad “gweithio mewn partneriaeth” ei ddefnyddio’n helaeth heddiw, ond nôl ym 1981, nid oedd dilyn ymagwedd gydlynol yn boblogaidd iawn. Roedd llwyddiant y Marathon Llundain cychwynnol wedi amlygu’r potensial ar gyfer cyflwyno digwyddiad sy’n ysbrydoli pobl i wthio’u hunain. Yn Neuadd y Ddinas Abertawe, roedd staff yr adran hamdden ar y pryd yn rhagweld y byddai’r digwyddiad a oedd yn cael ei gynllunio hefyd yn cynnig cyfle newydd ar gyfer ‘rhedeg i bawb’. Penodwyd John Collins, aelod profiadol o Harriers Abertawe, gan y cyngor i helpu Andrew Reid a Dave Flynn i drefnu’r digwyddiad. Roedd dyn arall â phrofiad yn y maes hwn i alw arno hefyd. Tair blynedd yn flaenorol, roedd Berwyn Price wedi ennill medal aur i Gymru yn ras clwydi 110 metr Gemau’r Gymanwlad yn Edmonton, Canada, ac roedd yn digwydd bod yn gydweithiwr i Andrew a Dave.

Roedd y tîm wedi’i ffurfio ac roedd angen rhywun o noddwyr y digwyddiad, The Evening Post, i ledaenu’r gair. Roedd yn bryd chwilio am yr hen dracwisg a threnyrs Adidas. Er nad oedd rhedeg ar y strydoedd yn newydd i rai pobl, roedd eraill yn teimlo bod angen arweiniad arnynt ynghylch sut i ymgymryd â llwybr rhedeg 6.2 milltir o hyd, felly penderfynwyd cyhoeddi awgrymiadau hyfforddi wythnosol. Roedd teimlad da yn y cyfnod cyn y digwyddiad y gallai’r ras newydd hon o’r enw ras 10k Bae Abertawe fod yn dechrau rhywbeth mawr. Ar ôl i fi rhoi gwybod i’r ymgeiswyr am yr ymdrech gorfforol y byddai’n ofynnol ganddynt wrth baratoi am y digwyddiad, ac yn ystod y ras ei hun, er cwrteisi penderfynais ymuno â’r 2,000 o redwyr eraill wrth y llinell ddechrau ar ddiwrnod y ras.

Felly, gan wisgo crys-t Post People, rhedais o St Helens tuag at y Mwmbwls ac yn ôl eto. Rwy’n cofio gofyn ym mhapur newydd y diwrnod canlynol a oedd dwy ras yn cael eu cynnal, gan ei fod yn ymddangos bod rhedwyr yn rhedeg tuag ataf wrth iddynt anelu am adref. Athletwyr profiadol oedd y rhain, yn ôl y sôn. Ond gan gadw at frandio fy nghrys, penderfynais redeg gyda’r bobl roeddwn i’n fwy cyfarwydd â nhw, y rhai oedd yn darllen y post, er nid oedd llawer o sgwrs rhyngom wrth i’r milltiroedd gynyddu. Ar ryw adeg, gwelais y llinell derfyn a chyfnod byr wedi hynny, sylweddolais y byddai’r digwyddiad hwn yn datblygu’n rhywbeth mawr.

Chris Peregrine
Awdur Masnachol, South Wales Evening Post, WalesOnline

Rhagor o wybodaeth ac i gadw’ch lle ar y llinell gychwyn