Chris Williams, Author at Admiral Swansea Bay 10K

Diweddariad am y ras 2022

Medi 13, 2022 By Chris Williams

Ar ran tîm 10k Bae Abertawe Admiral Cyngor Abertawe, hoffem fynegi ein tristwch mawr ar ôl clywed y newyddion am farwolaeth Ei Mawrhydi’r Frenhines. Ynghyd â llawer o gymunedau eraill yng Nghymru, y DU ac ar draws y byd, estynnwn ein cydymdeimlad dwysaf i’r Teulu Brenhinol ar yr adeg hon.

Yn dilyn y cyhoeddiad y bydd angladd Ei Mawrhydi’r Frenhines yn cael ei chynnal ddydd Llun 19 Medi, rydym bellach yn gallu cadarnhau y bydd ras 10k Bae Abertawe Admiral eleni a’r rasys iau 1k a 3k yn mynd yn eu blaenau, yn ôl y bwriad, ddydd Sul yma, 18 Medi. Hoffwn ddiolch i chi am eich amynedd.

Rydym yn gwerthfawrogi ac yn deall y bydd llawer o redwyr o bosib yn dymuno talu teyrnged hefyd y penwythnos hwn a chynhelir distawrwydd un funud cyn dechrau’r ras 10k.

Bydd pawb sydd wedi cofrestru ar gyfer y ras yn derbyn e-bost yn ddiweddarach yr wythnos hon yn cadarnhau gwybodaeth am y ras cyn y penwythnos, felly gwnewch yn siŵr eich bod yn gwirio’ch mewnflychau.

Lleoedd ychwanegol wedi’u cyhoeddi ar gyfer ras 2022 – mae amser i chi gofrestru o hyd!

Awst 19, 2022 By Chris Williams

Bythefnos yn unig sydd ar ôl i bobl sy’n dwlu ar ffitrwydd a chodi arian i elusennau gyflwyno’u ceisiadau ar gyfer 10k Bae Abertawe Admiral eleni.

Cyngor Abertawe sy’n gyfrifol am y digwyddiad, sy’n cael ei noddi gan Admiral. Yn ogystal â’r ras 10k, bydd rasys iau 1k a 3k ynghyd â ras 10k mewn cadair olwyn. Disgwylir i oddeutu 5,000 o bobl gymryd rhan yn y ras boblogaidd hon unwaith eto eleni.

Meddai Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, “Mae Ras 10k Bae Abertawe Admiral, sy’n un o ddigwyddiadau mwyaf poblogaidd y flwyddyn yn Abertawe, yn ras wych i athletwyr profiadol, pobl sy’n codi arian ar gyfer elusennau a phobl sydd am guro eu hamseroedd gorau neu drechu nodau ffitrwydd personol.

“Gyda golygfeydd prydferth Bae Abertawe yn y cefndir a’r ras yn cael ei rhedeg ar lwybr gwastad, mae’r digwyddiad arobryn hwn hefyd yn cynnwys rasys i blant sy’n rhoi cyflwyniad perffaith i redeg ar y ffordd iddynt.”

Mae Ras 10k Bae Abertawe Admiral wedi ennill sawl gwobr dros y blynyddoedd ac roedd tua 4,000 o redwyr wedi cymryd rhan ym mhrif ras y llynedd, ar gwrs a oedd yn mynd o safle San Helen i’r Mwmbwls ac yn ôl.

“Mae’r bobl sy’n cymryd rhan yn y ras yn gadarnhaol iawn am y profiad oherwydd safon trefnu a rheoli’r ras ac oherwydd y gefnogaeth maent yn ei derbyn gan y cannoedd o bobl sy’n bresennol ar hyd y llwybr.

“Gyda’r dyddiad cau ar ddiwedd mis Awst, hoffwn annog unrhyw un sydd â diddordeb mewn cymryd rhan yn nigwyddiad eleni i gofrestru cyn gynted â phosib i osgoi cael eich siomi. Hyn a hyn o leoedd sydd ar ôl ac mae’r ras bob amser yn llawn, yn aml cyn y dyddiad cau.”

Dyma’r 16eg ras 10k Bae Abertawe y mae Admiral wedi’i noddi. Meddai Paul Billington, Rheolwr Lles a Chymorth yn y Gweithle Admiral UK, “Rydym yn falch o gefnogi ras 10k Bae Abertawe Admiral am yr 16fed flwyddyn.

“Mae’n wych gweld cynifer o bobl yn dod at ei gilydd i gymryd rhan, o athletwyr proffesiynol i’r rheini sy’n rhoi cynnig arni am y tro cyntaf. Mae dros 200 o weithwyr Admiral wedi cofrestru ar gyfer yr her ac maent yn edrych ymlaen at ddigwyddiad gwych arall. Pob lwc i bawb a fydd yn cymryd rhan!”

Mae gan redwyr tan 31 Awst i wneud cais ar-lein

Gwahoddir rhedwyr i gofrestru ar gyfer ras 10K Bae Abertawe Admiral 2022!

Ionawr 11, 2022 By Chris Williams

Mae Cyngor Abertawe’n trefnu digwyddiad eleni ar gyfer ddydd Sul 18 Medi. Mae cynnig pris cofrestru cynnar ar gael tan 31 Ionawr.

Roedd digwyddiad y llynedd yn nodi’r 40fed tro i’r ras boblogaidd hon sydd bob amser yn cynnig cwrs arfordirol gwastad a hynod olygfaol gael ei chynnal.

Mae’r digwyddiad wedi ennill gwobrau’n rheolaidd ac mae’r cyngor am iddo barhau fel digwyddiad o safon, gan ddenu rhedwyr o bob oedran a gallu.

Sefydlodd Cyngor Abertawe’r ras ym 1981 ac maent wedi parhau i’w threfnu ers hynny – gan ei chynnwys yn rhaglen ddigwyddiadau flynyddol y ddinas.

Yr haf hwn fydd y 16eg achlysur hefyd i gwmni Admiral noddi’r digwyddiad, sydd yn ogystal â’r 10k yn cynnig rasys hwyl iau 1K a 3K, ynghyd â ras 10k i bobl mewn cadair olwyn a ras masgotiaid.

Meddai Aelod y Cabinet Robert Francis-Davies, “Mae ras 10k Bae Abertawe Admiral yn ddigwyddiad nodedig yn y calendr rhedeg ac mae’n denu cyfranogwyr o bob cwr o’r DU.

“Mae’n nodwedd boblogaidd iawn o galendr digwyddiadau blynyddol Abertawe; mae’n wych ar gyfer athletwyr ar lefel elît, pobl sy’n codi arian ar gyfer elusennau a’r rheini sy’n ceisio curo’u hamser gorau neu drechu’u nodau ffitrwydd.

“Mae cefndir anhygoel Bae Abertawe a’r cwrs gwastad yn golygu ei fod yn ddigwyddiad o’r radd flaenaf. “Roedd ras arbennig y llynedd i ddathlu’r 40fed ras yn llwyddiant enfawr – ac rydym yn hyderus y bydd digwyddiad 2022 yn llwyddiant hefyd.

“Rydym yn rhagweld bydd y galw am leoedd yn uchel unwaith eto eleni. Byddem felly’n annog unrhyw un sydd â diddordeb i gofrestru cyn gynted â phosib er mwyn osgoi cael ei siomi oherwydd unwaith y bydd y lleoedd ar gyfer y ras wedi’u llenwi, ni fydd rhagor ar gael!”

Meddai Rhian Langham, Pennaeth Gwasanaethau Pobl Admiral, “Rydym wrth ein boddau ein bod yn parhau i noddi ras 10k Bae Abertawe Admiral a’r rasys hwyl am y 16fed blwyddyn.

“Mae cefnogi digwyddiadau yn ein cymuned leol yn rhan fawr o ddiwylliant Admiral felly mae’n wych bod yn rhan o ddigwyddiad fel hwn, yn enwedig ar ôl blwyddyn anodd.

“Hoffwn ddymuno pob lwc i’r holl redwyr.”

Bydd Tîm Digwyddiadau’r cyngor yn parhau i fonitro sefyllfa’r pandemig. Cynhelir ras 10k Bae Abertawe Admiral dim ond os yw’n dilyn holl reoliadau a chanllawiau perthnasol Llywodraeth Cymru, Iechyd Cyhoeddus Cymru ac Athletau’r DU.

Caiff cynlluniau eu hadolygu wrth i unrhyw ganllawiau newydd gael eu cyhoeddi a gall hyn gynnwys newidiadau a mesurau ychwanegol i sicrhau bod digwyddiad 2022 yn ddiogel i bawb a fydd yn cymryd rhan, gan gynnwys y gymuned leol ehangach.

Roedd tua 4,000 o redwyr wedi cymryd rhan yn y ras y llynedd, gan redeg rhwng San Helen a’r Mwmbwls. Dyma’r ras 10k orau yng Nghymru yn ôl Gwobrau Rhedeg 2019.

I gadw’ch lle ar linell gychwyn ras 2022 ac i fanteisio ar y cynnig cynnar

Rhedwyr a chefnogwyr ar lan môr Abertawe ar gyfer ras 10k flynyddol lwyddiannus

Medi 21, 2021 By Chris Williams

Roedd rhedwyr a gwylwyr ar strydoedd Abertawe heddiw (ddydd Sul) ar gyfer ras 10k Bae Abertawe Admiral – oedd â thema liwgar yr 1980au.

Roedd tua 4,000 o redwyr wedi cymryd rhan yn un o’r digwyddiadau gorau o’i fath yn y DU. Dyma’r ras 10k orau yng Nghymru yn ôl Gwobrau Rhedeg 2019.

Yn ogystal â phrif ddigwyddiad y 10k, hefyd cynhaliwyd rasys iau 1k a 3k i blant a ras cadair olwyn 10k.

Cynhaliwyd y 40fed ras flynyddol rhwng San Helen a’r Mwmbwls, a chan mai’r thema oedd yr 80au, cafwyd gwisgoedd ffansi a hwyl o’r cyfnod hwnnw ar y dydd.

Roedd rhai agweddau ar y digwyddiad yn wahanol i’r blynyddoedd blaenorol oherwydd y mesurau yr oedd y trefnwyr, Cyngor Abertawe, wedi’u rhoi ar waith o ystyried y ffaith bod COVID-19 yn dal i fod gyda ni ac i helpu i leihau ymlediad y feirws ymhlith pawb a oedd yn rhan o’r digwyddiad.

Roedd y newidiadau’n cynnwys nifer is o gyfranogwyr, llai o ardaloedd lle byddai rhedwyr yn closio at ei gilydd a mesurau fel dechrau’r ras ar adegau gwahanol.

Meddai Robert Francis-Davies, Aelod y Cabinet dros Fuddsoddi, Adfywio a Thwristiaeth, “Mae 10k Bae Abertawe Admiral yn rhan allweddol o galendr digwyddiadau Abertawe felly roedd yn dda ei gweld yn ôl.

“Roedd miloedd o bobl wedi mwynhau’r awyrgylch ac wedi cael ychydig oriau mas rhagorol. Rydym yn gwneud popeth y gallwn i’w cadw’n ddiogel a diolchwn i bawb a gyfrannodd mewn unrhyw ffordd at wneud y digwyddiad yn llwyddiant. A gallwn ddweud yn awr ein bod yn bwriadu’i chynnal eto’r flwyddyn nesaf ar 18 Medi, felly dylai pob rhedwr brwd nodi’r dyddiad yn ei ddyddiadur.”

Hwn oedd y 15fed tro i Admiral noddi’r digwyddiad.

Bydd holl ganlyniadau’r rasys ar gael i’w gweld ar-lein.

Bydd ffotograffau swyddogol o’r rasys ar gael yr wythnos hon ganphoto-fit.net, ffotograffydd swyddogol ras 10K Bae Abertawe Admiral.

Mae Cyngor Abertawe bellach wedi cadarnhau y cynhelir 10k Bae Abertawe Admiral 2022 ddydd Sul 18 Medi.

Ras 10k a Ras Hwyl Bae Abertawe – Y Dechrau

Awst 25, 2021 By Chris Williams

Dros yr ychydig wythnosau nesaf i ddathlu ein pen-blwydd yn 40 oed, bydd Nigel Jones, sydd wedi bod yn Gyfarwyddwr Rasys 10k Cyngor Abertawe ers 1986, yn archwilio’i archif 10k helaeth ac yn siarad â rhai o’r bobl allweddol sydd wedi bod yn rhan o’r ras dros y blynyddoedd.

Yn troi am adref | 1982 | Llun trwy garedigrwydd: Wales Online

Mae ein hail erthygl gan David Flynn, cyfarwyddwr y ras 10k Bae Abertawe wreiddiol ym 1981…

Yn dilyn llwyddiant mawr y Marathon Llundain cychwynnol yng ngwanwyn 1981, cynigodd Cyfarwyddwr Datblygu Economaidd Cyngor Abertawe ar y pryd, Roger Warren-Evans, y dylai cyngor y ddinas gynnal marathon i dorf o gyfranogwyr i helpu i hyrwyddo’r ddinas.

Rhan o’m swydd fel Cynorthwy-ydd Chwaraeon ar y pryd, oedd trefnu Pencampwriaethau Dinesig y Cyngor gan gynnwys ras hwyl Calan Mai flynyddol, y rhoddais fywyd newydd iddi trwy ei hyrwyddo’n eang fel ras hwyl yng ngwir ystyr y gair. A minnau’n rhedwr cystadleuol, fy nghyfrifoldeb i a’m rheolwr llinell, J Andrew Reid, oedd ystyried ymarferoldeb cynnal digwyddiad o’r fath yn Abertawe.

Daeth yn amlwg yn fuan nad oedd llwybr addas o fewn ffiniau’r ddinas, felly dechreuon ni drafodaethau gyda Chyngor Castell-nedd er mwyn cynnal digwyddiad ar y cyd gyda llwybr arfaethedig gan ddefnyddio Mumbles Road/Promenâd, A4067 a’r A483 yn Abertawe ac yna ymlaen ar hyd yr A483 (Jersey a’r A48 yng Nghastell-nedd a Phort Talbot.

Wrth i ymarferoldeb y digwyddiad gael ei drafod mewn nifer o gyfarfodydd, cynhaliwyd hanner marathon “prawf” yng Nghastell-nedd o gaeau chwarae Cwrt Herbert i fyny ac o gwmpas cwrs heriol iawn hyd at y Creunant ac yn ôl i Gastell-nedd trwy rai ffyrdd cefn.

Ni ddefnyddiwyd y cwrs hwn byth eto ond roedd yn rhagflaenydd i hanner marathon Castell-nedd llwyddiannus iawn a ddechreuodd yn Llandarcy (Gellir gweld fideo o ddigwyddiad 1986 ar YouTube).

Yma mae’r stori’n datblygu a chafwyd y syniad o ras 10k Bae Abertawe.

Roedd grŵp o Harriers Abertawe a oedd yn fy nghynnwys i, Steve “Jock” Seaman a Gerry Batty a John Collins, sydd bellach wedi marw, yn cael peint ar ôl noson hyfforddi yn y clwb a chododd pwnc y marathon a theimlwyd nad oedd isadeiledd addas ar gyfer trefnu marathon yn Abertawe i’r raddfa yr oedd y cyngor yn ei ddymuno ac wedyn trafodwyd pellterau eraill.

Roedd John Collins wedi bod yn un o aelodau sefydlu Cynghrair Traws Gwlad hynod lwyddiannus Gwent (a ailenwyd yn Gynghrair Traws Gwlad Gwent JH Collins yn ddiweddar) ac roedd Gerry Batty yn un o sylfaenwyr Cynghrair Traws Gwlad boblogaidd Gorllewin Morgannwg, felly roedd gan y ddau brofiad gwych ac mae’r ddwy gynghrair yn parhau i fod yn llwyddiannus hyd heddiw. Rwy’n credu bod Gerry, a oedd yn gweithio yn y Gofrestrfa Tir, ac a oedd bob amser yn edrych ar fapiau ar gyfer rasys hyfforddi amrywiol, wedi awgrymu ras allan yn ôl ac ymlaen o gae criced a rygbi San Helen i’r Mwmbwls – llwybr hyfforddi a ddefnyddir yn rheolaidd hyd heddiw.

Dywedais wrth y cyngor am hyn a oedd yn cytuno’n llwyr â’r syniad, a gofynnwyd i mi ei threfnu.

Dwi ddim am fynd i fanylion y cynllunio, ond mae’n werth nodi nad oedd Mumbles Road erioed wedi bod ar gau i draffig ar gyfer digwyddiad o’r fath o’r blaen, ond ar ôl sawl cyfarfod gyda’r Swyddog Diogelwch Ffyrdd, Elwyn Davies, tad Stuart Davies, Capten Rygbi Abertawe a Chapten Rygbi Cymru’r dyfodol, rhoddodd Adran Priffyrdd Gorllewin Morgannwg gymeradwyaeth i gau’r ffyrdd a dechreuodd y gwaith ar gynllunio’r ras 10k Bae Abertawe gyntaf o ddifri.

Roedd y llwybr yn syml, allan i’r Mwmbwls ar y ffordd ac yn ôl ar hyd y Promenâd, ond yn wahanol i heddiw doedd dim pont droed yn Lido Blackpill felly aeth y llwybr o gwmpas y llyn cychod ac i’r palmant i ailymuno â’r cwrs.

O’r dechrau, y cynllun oedd cynnal ras a ras hwyl a fyddai’n dal prawf amser trwy sicrhau bod y ras o’r ansawdd uchaf fel Marathon Llundain a bod y cwrs yn addas i bawb. Dyma’r adeg y cynhaliwyd rasys hwyl ledled y wlad ac yn aml roedd eu poblogrwydd cychwynnol yn diflannu ar ôl ychydig flynyddoedd.

I wneud hyn, aethom ati i sicrhau noddwyr lleol, a’r cyntaf oedd y South Wales Evening Post ac yna Allux Windows ynghyd â chyllideb hael gan y cyngor ac roedd y cynnig hwn yn caniatáu i ni gynnig gwobr ariannol hael a thalu costau teithio a llety ar gyfer athletwyr profiadol gwahoddedig fel a wnaed mewn rasys mawr eraill.

Gweithiodd y strategaeth hon a denwyd rhedwyr o’r safon uchaf i’r ras o bob rhan o’r DU ac mae hyn yn parhau hyd heddiw.

Er mwyn hybu apêl y ras o deithio i Abertawe ymhellach, cynhaliwyd ras 5k wâdd nos Wener cyn y prif ddigwyddiad yn ail flwyddyn y digwyddiad o gwmpas hen Ganolfan Siopa Dewi Sant. Roedd hyn yn fyrhoedlog oherwydd tranc y ganolfan.

Roeddwn i’n Gyfarwyddwr y Ras am 5 mlynedd gyntaf y digwyddiad cyn trosglwyddo’r awenau i Nigel Jones, sy’n parhau i fod yn Gyfarwyddwr y Ras hyd heddiw.

gan David (Dai / Dave) Flynn