Bydd nifer o ffyrdd ar gau ddydd Sul ar gyfer ras 10k Bae Abertawe Admiral.

Disgwylir y bydd tua 4,500 o redwyr yn cymryd rhan yn y brif ras, sy’n dechrau y tu allan i Faes Rygbi San Helen am 1pm ac yn mynd i’r Mwmbwls ac yn ôl.

Cyngor Abertawe sy’n gyfrifol am y digwyddiad. Bydd rasys eraill yn cael eu cynnal ar y diwrnod hefyd, gan gynnwys rasys 1k, 3k a 5k ar gyfer y rhai iau yn ogystal â’r ras 100 metr draddodiadol i fasgotiaid. Mae’r holl leoedd ar gyfer pob ras (heblaw am y masgotiaid) bellach yn llawn, felly ni fydd pobl yn gallu cofrestru  i gymryd rhan ar y diwrnod.

Bydd y ffyrdd a restrir isod ar gau rhwng tua 12pm a 2pm.

Amcangyfrifon yw’r amseroedd ailagor oherwydd maent yn dibynnu ar gyflymder y rhedwyr.

Lle bo’n bosib mae llwybrau dargyfeirio ar gael. Darperir gwybodaeth i’r holl leoliadau ger y cwrs y gallai’r trefniadau effeithio’n uniongyrchol arnynt.

Amseroedd*	Ffordd	Nodiadau
12:00 – 13:30	Heol y Mwmbwls	Ffordd ar gau rhwng Heol Neuadd y Ddinas-De a Lôn Sgeti.
12:00 – 13:30	Lôn Brynmill	Ffordd ar gau rhwng Heol y Mwmbwls a Heol Bryn, ac eithrio mynediad i gyfeiriad y de i’r Rec gerllaw Lôn Brynmill ar gyfer parcio, os bydd lle ar gael.
12:00 – 12:45	Lôn Sgeti	Troi i’r dde yn unig ar Heol y Mwmbwls .
12:45 – 13:45	Lôn Sgeti	Ffordd ar gau (i gyfeiriad y de) Cynhelir mynediad i Ysbyty Singleton a Phwll Cenedlaethol Cymru
12:45 – 13:45	Heol y Mwmbwls	Ffordd ar gau i gyfeiriad y Mwmbwls yn unig rhwng Lôn Sgeti a Heol Mayals. Troi i’r chwith yn unig (tuag at ganol y ddinas) o Heol Ashleigh, Heol Derwen Fawr, Lôn y Felin a Heol Mayals.
12:45 – 13:45	Heol y Mwmbwls	Ffordd ar gau rhwng Heol Mayals a Heol Fairwood.
12:45 – 14:00	Heol y Mwmbwls	Ffordd ar gau i gyfeiriad y Mwmbwls yn unig rhwng Heol Fairwood a Heol Newton . Troi i’r chwith yn unig tuag at ganol y ddinas o Heol Alderwood, Lôn Bethany, Palmyra Court, Rhodfa Norton a Heol Newton.

 

Mae pecynnau’r ras wedi’u hanfon, mae’r rhifau wedi’u cadarnhau ac mae’r cyffro wedi dechrau – dyma ein blogiwr, Georgia (rhif ras: 2017) gyda’r rhan olaf o’i blog hyfforddi ar gyfer y ras 10k.

Heb dderbyn eich pecyn ras eto? E-bostiwch y tîm yn special.events@swansea.gov.uk

Dyma fy rhif – 2017!

Roeddwn i’n gwybod mai hwn oedd yr wythnos lawn olaf o weithio’n galed wrth hyfforddi cyn i mi arafu wrth i ras 10k Bae Abertawe Admiral nesáu! Sicrheais fy mod i’n cwblhau 4 sesiwn a’m bod i’n herio fy hun, yn enwedig yn ystod y sesiwn Pwmpio’r Corff ddydd Iau.

Sesiwn 1: Dydd Llun
Rhedeg 5k = 25:39
Ar ôl rhedeg 10k da bore Sadwrn, nid oeddwn yn barod i redeg y pellter llawn ar ddechrau’r wythnos. Penderfynais y byddai rhedeg 5k yn gynt yn opsiwn gwell – digon i gael fy nghoesau i weithio ac i gwblhau fy nghamau am y dydd. Roedd hi’n braf rhedeg ar hyd llwybr gwahanol i’r arfer fel fy mod i’n gallu mwynhau’r golygfeydd syfrdanol dros Fae Abertawe o ongl newydd.

Sesiwn 2: Dydd Mawrth
Ioga cyfunol 60 munud
Daeth dwy o’m cyd-letywyr i’r dosbarth yr wythnos hon, a chawsom ddosbarth ‘ymarfer corff’ cymdeithasol iawn.Roedd hyfforddwr gwahanol felly doedd y dosbarth ddim mor anodd â sesiwn yr wythnos ddiwethaf, ond roeddwn yn dal i gyfri’r ailadroddiadau a oedd ar ôl wrth wneud yr eisteddiadau – mae’n ddiogel dweud na fydd gennyf becyn chwech yn y dyfodol agos.

Sesiwn 3: Dydd Mercher
Rhedeg 10k = 54:27
Dylwn wybod erbyn hyn, ar ôl rhedeg 7.5km da, pan oeddwn wedi rhedeg tir chwarter o’r ffordd, mai dim ond mater o amser fydd hi cyn i mi ddechrau dioddef o redeg yn bell – ac yn ôl y disgwyl, wrth gyrraedd 8k yn union cefais boen yn fy ochr a oedd gyda mi wedyn am y 10 munud olaf. Roedd llawer o hercian a gwasgu dannedd wrth redeg er mwyn cyrraedd y pellter llawn, ond hwn oedd fy 10k olaf cyn diwrnod y ras, felly roedd rhaid dal ati!

Sesiwn 4: Dydd Iau
Pwmpio’r Corff 60 munud
Gan mai hwn oedd y sesiwn codi pwysau trwm olaf cyn y ras 10k, penderfynais herio fy hun a chodi pwysau trymach wrth wneud traciau’r frest, yr ysgwyddau a’r cyhyryn triphen. Ni waeth faint rwyf yn hyfforddi, yr unig beth sydd byth yn mynd yn haws yw’r hergiadau – dyma’r ymarfer corff rwyf yn ei fwynhau lleiaf, ac mae’r cychwyniad gohiriedig dolur cyhyrol (DOMS) rwy’n dioddef ohono’n cadarnhau hynny!

Ni allaf gredu pa mor gyflym mae’r 7 wythnos ddiwethaf wedi mynd, a bod llai nag wythnos nes diwrnod y ras! Dwi’n gyffrous dros ben ond hefyd yn eithaf nerfus, yn enwedig am fod gennyf amser i’w guro, yn hytrach na bod yn hapus i orffen y ras yn unig.

Dwi wirioneddol wedi mwynhau rhannu fy nhaith hyfforddiant â chi ac rwy’n gobeithio ei bod wedi’ch diddanu, wedi’ch llawenhau ac efallai wedi’ch ysbrydoli ar hyd eich taith 10k eich hunain hyd yn oed.

Byddaf yn siŵr o’ch hysbysu am sut aeth pethau ac os lwyddais i guro fy amser gorau (56:00) ar ein cyfrifon Facebook a Twitter yr wythnos nesaf! @mwynhauabertawe

Pob lwc i bawb sy’n cymryd rhan ddydd Sul… mi welai chi wrth y llinell ddechrau!

Georgia x

Mae’r wythnosau’n gwibio heibio, mae’r rhai bach nôl yn yr ysgol ac mae’r aelod diweddaraf o’n tîm, Georgia, yn paratoi’n dda ar gyfer 10k Bae Abertawe Admiral, sydd bellach 20 niwrnod yn unig nes iddi gael ei chynnal! Dyma’r rhan ddiweddaraf o’i blog hyfforddi:

Rwy’n cyfaddef, mae ceisio gwneud 4 sesiwn ymarfer corff mewn wythnos ar ben gwaith a chymdeithasu’n anodd ei drefnu, ond rwy’n siŵr byddaf yn diolch i mi fy hun ar ddiwrnod y ras (ar yr amod fy mod i’n curo fy mherfformiad personol gorau, hynny yw).

Yn y cyfamser, rwyf mor lwcus bod gen i olygfeydd fel hyn wrth i mi hyfforddi. Mae’n lleddfu’r poen yn fy nghoesau a’r teimlad o losgi yn fy ysgyfaint pan fo’r haul yn disgleirio ac mae’r llanw’n uchel.

Dyma grynodeb o hyfforddiant yr wythnos diwethaf:

Sesiwn 1: Dydd Mawrth
Ioga cyfunol 60 mun
Mae’n gas gen i ddweud hyn, ond rwyf bob amser wedi bod yn un o’r amheuwyr ‘na o ran ioga sy’n honni nad ‘ymarfer go iawn’ yw e. Fodd bynnag, mae’r dosbarth ‘ma wedi fy estyn (a gwella fy nghydbwysedd). Mae’n deg dweud y bu llawer o goesau sigledig, a thipyn o chwerthin ar y ffordd. Mewn gwirionedd roedd yn braf rhoi cynnig ar rywbeth newydd ac roedd yn llai dwys na rhai o’n sesiynau eraill.

Sesiwn 2: Dydd Mercher
Sesiwn gyflymder – 7km = 38:16
Er bod yr haul yn disgleirio heddiw, byddai’n well gen i sipian cwrw oer ar ôl y gwaith na gwisgo fy esgidiau hyfforddi ac ymestyn fy nghoesau oedd eisoes yn flinedig ar hyd y prom. Ond beth bynnag, llwyddais i gwblhau ‘sesiwn gyflymder’ arall hyd yn oed os nad oeddwn yn gallu cyflawni’r 10 munud olaf o redeg cyflym cyson.

Sesiwn 3: Dydd Iau
Sesiwn HIIT a chodi pwysau
Efallai nad yw 0.2km/a yn gynt ar y droedfelin yn swnio fel cymaint o gamp, ond credwch chi fi – mae symud o 15km/h i 15.2km/h bron yn ddigon i beri i mi gwympo oddi ar y cefn. Ond roedd 11 munud o waith caled yn hollol werth chweil pan lwyddais i gwblhau’r sesiwn lawn gyda pherfformiad personol gorau (buddugoliaethau bach ac ati).

Sesiwn 4: Dydd Sadwrn
Ras 10km = 53:05
Ar ôl y penwythnos hir yr wythnos ddiwethaf, roeddwn yn gwybod bod rhaid i mi ddechrau hon yn gywir – yn bennaf gyda batri ffôn wedi’i wefru’n llawn!! Roedd yr haul yn disgleirio, roedd yr awyr yn ffres ac roeddwn yn barod i fynd i’r afael â’r pellter llawn y bore ‘ma. Gwnes i ymdrech fawr dros y cilometr olaf i guro’r cloc ac roedd yn bendant yn werth gwneud hynny – nawr y cyfan sydd ei angen arna’ i yw ail-wneud hyn ar ddiwrnod y ras!

Ddydd Sadwrn oedd fy ras 10k lawn gyntaf ers 10k Cymru ar ddechrau mis Gorffennaf, felly dyma’r meincnod a fydd yn sail i’r hyn byddaf yn ei wneud dros y pythefnos nesaf. Croesi bysedd y byddaf yn gallu cwblhau o leiaf 2 ras 10k lawn cyn diwrnod y ras, wrth i mi anelu at fy mherfformiad personol gorau.

Blog arall cyn bo hir,

Georgia x