Bydd sawl aelod o staff Grŵp Admiral yn cymryd rhan yn ras 10k Bae Abertawe Admiral eleni.

Gyda’r digwyddiad a gynhelir ddydd Sul 16 Medi yn prysur nesáu, mae dros 250 o staff Grŵp Admiral yn brysur yn gwneud eu paratoadau terfynol cyn cymryd rhan.

Byddant ymhlith miloedd sy’n cymryd rhan yn y prif ddigwyddiad, gyda rasys 1k, 3k a 5k i blant hefyd yn cael eu cynnal ar y diwrnod.

Mae digwyddiadau hwyl eraill yn cynnwys ras masgotiad 100 metr y tu allan i San Helen sy’n dechrau tua 10 munud ar ôl y brif ras.

Meddai Ceri Assiratti, Pennaeth Gwasanaethau Pobl Admiral, “Mae’n bleser gennym noddi ras 10k Bae Abertawe Admiral a’r rasys iau am y 12fed flwyddyn yn olynol. Mae noddi digwyddiadau yn ein cymuned leol yn rhan bwysig o ddiwylliant Admiral ac mae’n wych bod yn rhan o ddigwyddiad fel hwn sy’n datblygu’n fwy poblogaidd blwyddyn ar ôl blwyddyn.

“Mae nifer y gweithwyr sydd wedi cofrestru i gymryd rhan yn ras 2018 yn amlygu ei phwysigrwydd i’n staff a’r ardal leol. Hoffwn achub ar y cyfle hwn, ar ran pawb yn Admiral, i ddymuno pob lwc i’r holl redwyr.”

Eleni yw’r wythfed flwyddyn y mae Steve Williams-Jones o adran Hawliadau Admiral wedi cymryd rhan. Rhedodd ei ras gyntaf yn 2007 ac mae wedi cymryd rhan bron bob blwyddyn ers hynny.

Mae Steve yn dioddef o gyflwr iechyd tymor hir ac mae rhedeg yn ei helpu i gadw’n heini ac ar y trywydd iawn.

Meddai, “Mae’n gwrs gwych i’w redeg arno – nid yw’n rhy brysur, mae’n wastad ac mae’r golygfeydd mor odidog. Mae yna awyrgylch gwych, nid yw’n teimlo’n rhy gystadleuol ac mae pawb i weld yn cael amser da. Mae’r gefnogaeth gan wylwyr a’r preswylwyr ar hyd y llwybr hefyd yn wych ac mae’n rhoi hwb i chi wrth redeg.”

Eleni, bydd Steven yn rhedeg gyda’i gydweithiwr, Jo Griffiths, sydd hefyd o’r adran Hawliadau.

Dyma’r pumed tro i Jo gymryd rhan, ac mae fel her bersonol iddi. Meddai, “Rwyf wir yn mwynhau’r awyrgylch ac mae pawb yn cefnogi ei gilydd, ni waeth beth yw eich gallu”.

Mae’n ddigwyddiad gwych i’r teulu ac mae’n helpu bod y llwybr yn un da hefyd – does dim bryniau mawr!” Mae plant Jo hefyd wedi cymryd rhan dros y blynyddoedd a bydd ei phlentyn ieuengaf yn cymryd rhan yn y ras 1k eleni.

Meddai’r Cyng. Robert Francis-Davies, Aelod Cabinet Cyngor Abertawe dros Arloesedd, Adfywio a Thwristiaeth, “Mae Grŵp Admiral wedi bod yn noddi ras flynyddol 10k Bae Abertawe Admiral am nifer o flynyddoedd, gan helpu’r digwyddiad i dyfu mewn statws a phroffil.

“Rwy’n annog cynifer o bobl â phosib i sefyll ar hyd y llwybr i gefnogi’r cyfranogwyr, ni waeth os ydynt yn athletwyr o’r radd flaenaf neu’n rhedwyr hwyl sy’n  codi arian ar gyfer elusen.”

Croesawir gwylwyr o 10am – cynhelir y rasys iau rhwng 10.45am a 12pm a bydd y brif ras yn dechrau am 1pm.

Anfonir miloedd o becynnau ras i’r rheiny sy’n rhedeg yn ras 10k Bae Abertawe Admiral o’r wythnos nesaf.

Mae’r pecynnau ras yn cynnwys arweiniad ar gyfer diwrnod y ras, rhif personol ar gyfer y ras gyda sglodyn cofnodi amser electronig ar y cefn a manylion am sut i gasglu crys T technegol 2018.

Eich cyfle olaf i gyflwyno cais ar gyfer y ras flynyddol, a gynhelir ddydd Sul 16 Medi, yw Friday 31 Awst.

Cyngor Abertawe sy’n cynnal y digwyddiad, ac mae’n cael ei noddi gan Admiral am y ddeuddegfed flwyddyn yn olynol. Yn ogystal â’r 10k, bydd rasys iau 1k, 3k a 5k ynghyd â ras 10k mewn cadair olwyn.

Disgwylir i oddeutu 5000 o bobl gymryd rhan unwaith eto eleni.

Meddai’r Cyng. Robert Francis-Davies, Aelod Cabinet Cyngor Abertawe dros Arloesedd, Adfywio a Thwristiaeth, “Gyda chynifer o olygfeydd hardd, nid yw’n syndod bod rhedeg yn rhan o ddiwylliant cyfoethog ein dinas.

“Yn gynharach eleni, enwyd ras 10k Bae Abertawe Admiral yn ras 10k orau Cymru yng Ngwobrau Rhedeg 2018 ac mae hefyd wedi cael ei henwebu yng Ngwobrau Rhedeg 2019.”

Meddai’r Cyng. Francis-Davies, “Mae Ras 10k Bae Abertawe Admiral, sy’n un o ddigwyddiadau mwyaf poblogaidd y flwyddyn yn Abertawe, yn ras wych i athletwyr profiadol, pobl sy’n codi arian ar gyfer elusennau a phobl sydd am guro eu hamseroedd gorau neu gyflawni nodau ffitrwydd personol.

“Gyda bae eiconig Abertawe yn y cefndir a’r ras yn cael ei rhedeg ar gwrs gwastad, mae’r digwyddiad arobryn hwn hefyd yn cynnwys rasys iau i blant, sy’n rhoi cyflwyniad perffaith i redeg ar y ffordd.

“Gyda’r dyddiad cau ar ddiwedd mis Awst, byddwn yn annog unrhyw un sydd â diddordeb yn y digwyddiad eleni i gyflwyno cais cyn gynted â phosib er mwyn osgoi cael ei siomi gan fod y ras bob amser yn llawn ac yn aml yn cyrraedd y sefyllfa honno cyn y dyddiad cau.

“Mae’r bobl sy’n cymryd rhan yn y ras yn gadarnhaol iawn am y profiad oherwydd safon trefnu a rheoli’r ras ac oherwydd y gefnogaeth maent yn ei derbyn gan y cannoedd o bobl sy’n bresennol ar hyd y llwybr.”

Cynhelir ras i fasgotiaid hefyd ar ddiwrnod ras 10k eleni, felly croesewir pobl sydd am gofrestru fel rhan o grwpiau, sefydliadau a chwmnïau mewn ymdrech i ennill y £100 sydd ar gael i’r masgot buddugol.

Ewch i www.swanseabay10k.com/cy i gofrestru neu i gael mwy o wybodaeth.

Manylion cofrestru:

• 10k: £23 i aelodau o glwb/£25 i’r rhai nad ydynt yn aelodau o glwb. Bydd pawb sy’n cymryd rhan yn derbyn crys T technegol. Bydd pawb sy’n cwblhau’r ras yn derbyn medal a bag rhoddion.
• Rasys iau: £7. Bydd pawb sy’n cymryd rhan yn derbyn crys T technegol. Bydd pawb sy’n cwblhau’r ras yn derbyn medal, tystysgrif a bag rhoddion.
• Gellir dod o hyd i’r holl fanylion a dolenni er mwyn cofrestru ar gyfer y rasys ar-lein yn swanseabay10k.com/cy
• I bleidleisio dros ras 10k Bae Abertawe Admiral yng Ngwobrau Rhedeg 2019, ewch i therunningawards.com